Fakulteti është krijuar me Vendim të Këshillit të Ministrave të Republikës së Shqipërisë, nr. 650, datë 14.09.2011, si një nga njësitë kryesore të Akademisë së Studimeve të Aplikuara “Reald”, sot Kolegji Universitar “Reald”.

Në fillim kishte në përbërjen e tij tre departamente: i Financës, Menaxhimit dhe Marketingut.

Por, në Departamentin e Marketingut, numri i studentëve nga viti në vit pësoi rënie gjë që çoi në shkrirjen e tij. Sot Fakulteti Ekonomik ka në përbërjen e tij këto departamente:

• Departamenti i Financës
• Departamenti i Menaxhimit
• Qendra Kërkimore.

Fakulteti Ekonomik ofron dy programe studimi me kohë të plotë të Ciklit të Parë të studimeve: “Bachelor” në “Financë” dhe “Bachelor” në “Menaxhim”, një program me kohë të plotë të Ciklit të Dytë të studimeve “Master Shkencor” në “Financë dhe Tregje Financiare”, si dhe një program profesional 2-vjeçar “Asistent Administrativ”.

Aktualisht, Fakulteti i Ekonomisë operon në bazë të programeve të reja mësimore, në përshtatje me programet e shkollave perëndimore dhe bazur në nevojat e tregut të Rajonit jugor.

Departamenti Menaxhim është pjesë e Fakultetit të Ekonomisë pranë Kolegjit Universitar “Reald”. Ai është krijuar në vitin 2011, në fillim me një numër të vogël studentësh, që nga viti në vit numri i tyre është rritur ndjeshëm.
Në departamentin tonë do të gjeni programe mësimore bashkëkohore me nivel të lartë shkencor, përafruar me universitetet evropiane me të cilët kemi marrëveshje bashkëpunimi. Departamenti ynë ofron Programin e Studimit Bachelor në Menaxhim me perspektivë hapjen e Masterit për Menaxhim. Objektivi kryesor i Programit të Studimit “Bachelor në Menaxhim” është t’u japë studentëve një sistem bazë njohurish formuese në fushën e menaxhimit dhe të marketingut për formimin e specialistëve të aftë për të punuar në fushat përkatëse në subjekte të sektorit privat, të sektorit shtetëror dhe për realizimin e studimeve të avancuara në këto fusha. Për realizimin e këtyre objektivave, programi parashikon studime në fusha të tilla si ato: të menaxhimit, të marketingut, të financës, të kontabilitetit, të informatikës dhe të statistikës, të mikro dhe makroekonomisë, të legjislacionit tregtar, etj.Sistemi i njohurive që ofrohet nga ky program dhe aftësitë që përfitojnë studentët nëpërmjet tij, u mundësojnë atyre ndjekjen e një karriere kërkimore apo akademike, nëpërmjet vazhdimit të studimeve të ciklit të dytë, duke rritur mundësitë për sukses profesional në tregun e punës.Ne kemi një staf tepër të kualifikuar e me përvojë të gjatë në mësimdhënie në arsimin e lartë. Në përbërje të stafit kemi një profesor, një Prof.Dr, një Prof.As., dy doktorë shkencash, dhe tre doktorantë.

Për vitin akademik 2020-2021 ftojmë të gjithë maturantët e Rajonit jugor që të aplikojnë për studime në degën tonë.